ye tasallii hai ki hain naashaad sab
main akelaa hii nahiin barabaad sab
sab kii Khatir hai yahaaN sab ajanabii
aur kahane ko hain ghar aabaad sab
bhuul ke sab ranjishen sab ek hain
main bataauuN sabko hogaa yaad sab
sab ko daavaa-e-vafaa sab ko yaqiin
is adakaarii mein hain ustaad sab
shahar ke haakim kaa ye faramaan hai
qaid mein keh laayenge aazaad sab
chaar lafzon mein kaho jo bhii kaho
us ko kab furasat sune fariyaad sab
No comments:
Post a Comment